|
روزانه ڪاوش |
|
اوڍا-الرا تڪرار جي خاتمي لاءِ پريالوءِ لڳ پوليس آپريشن،ڳوٺن تي چڙهايون،11 ڄڻا گرفتار پريالوءِ/پير جو ڳوٺ (نمائندن وٽان) پريالوءِ لڳ هلندڙ اوڍا-الرا خوني تڪرار سبب پيدا ٿيل ڇڪتاڻ ختم ڪرائڻ لاءِ پوليس جو آپريشن،11 ڄڻا گرفتار، ڪچي واري علائقي الرا جاگير ۾ هلندڙ اوڍا- الرا خوني تڪرار دوران عيد جي ٻئي ڏينهن ٿيل جهيڙي ۾ ٽن ڄڻن جي قتل کانپوءِ پيدا ٿيل ڇڪتاڻ جي خاتمي ۽ ڪيسن ۾ گهربل جوابدارن جي گرفتاري لاءِ مختلف ٿاڻن جي پوليس ڳوٺ پڪا الرا، ديواني الرا، ڳوٺ سليمان الرو، ڳوٺ محمد حيات الرو، قائم خان اوڍو، حاجي ميرل اوڍو، معصوم اوڍو ۽ ملهار اوڍو سميت ٻنهي ڌرين جي ڳوٺن تي چڙهايون ڪيون، جنهن دوران پوليس اوڍا برادري جي ٽن ڄڻن امتياز حسين، غلام مصطفيٰ ۽ ذاڪر حسين اوڍو ۽ الرا برادري جي 8 ڄڻن منير احمد، حافظ امان الله، رستم، شهزادو، عبدالغفار، سعيد احمد ۽ ٻين کي گرفتار ڪري فيض محمد ٻنڊو ٿاڻي تي لاڪپ ڪري ڇڏيو آهي، رابطو ڪرڻ تي ايس پي او ڪيٽي پاڳارو ٻڌايو ته ڌرين ۾ هلندڙ خوني تڪرار جي خاتمي ۽ ڇڪتاڻ گهٽ ڪرڻ لاءِ آپريشن ڪيو ويو آهي، اميد آهي ته ڪجهه ڏينهن اندر ڌرين کي فيصلي لاءِ راضي ڪري وٺنداسين، ٻئي طرف برادري جي چڱي مڙس ۽ يوسي نائب ناظم پريالوءِ عبدالحق اوڍو ٻڌايو ته پوليس جي ڪيل چڙهائي ۾ پوليس اسان جي 11 نوجوانن کي کنڀي وئي آهي، هوڏانهن الرا برادري جي عبدالحفيظ الرو، مير الرو ۽ ٻين صحافين کي ٻڌايو ته اسان پوليس جي چوڻ تي پنهنجا ماڻهو پوليس حوالي ڪيا آهن ۽ پوليس اسان جي گهرن ٻاهران پڪٽون قائم ڪيون آهن. |