|
بجلي جي اڻ اعلانيا لوڊشيڊنگ نه ٿيندي،خلاف ورزي تي ڪارروائي جو اعلان اسلام آباد(بيورو رپورٽ) وفاقي حڪومت بجلي مئنيجمينٽ ۾ ناڪام، ملڪ ۾ 4 هزار ميگاواٽ بجلي کوٽ جو اعتراف، شهرن ۾ 6 ۽ ٻهراڙين ۾ 8 ڪلاڪ باضابطه لوڊشيڊنگ جو فيصلو، حڪومت پاران بجلي فراهم ڪندڙ ڪمپنين کي اڻ اعلانيل لوڊشيڊنگ نه ڪرڻ جو حڪم، اهڙا فيصلا ڪالهه پاڻي۽ بجليءَ واري وفاقي وزير راجا پرويز اشرف جي صدارت هيٺ اجلاس ۾ ڪيا ويا.پاڻي ۽ بجلي واري وفاقي وزير راجا پرويز اشرف جي صدارت هيٺ ملڪ اندر بجليءَ جي لوڊشيڊنگ تي غور لاءِ منعقد اجلاس ۾ وفاقي وزير پيپڪو توڙي بجلي فراهم ڪندڙ ڪمپنين ملڪ اندر اڻ اعلانيل لوڊشيڊنگ ڪنهن به صورت ۾ نه ڪرڻ جون هدايتون جاري ڪيون آهن. هن چيو ته لوڊشيڊنگ جو ميڊيا ۾ اعلان ڪري ان تي مڪمل نموني سان عملدرآمد ڪيو وڃي،خلاف ورزي ڪندڙ عملدارن خلاف ڪارروائي ڪئي ويندي، اجلاس ۾ آگاهي ڏني وئي ته ملڪ اندر 4000 ميگاواٽ بجلي جي کوٽ برقرار آهي،ان حوالي سان فيصلو ڪيو ويو ته شهري علائقن ۾ 6 ڪلاڪ ۽ ٻهراڙي وارن علائقن ۾ 8 ڪلاڪ لوڊشيڊنگ ڪئي ويندي، اجلاس ۾ بجلي ڪمپنين جي سربراهن کي هدايت ڪئي وئي ته لوڊشيڊنگ پلان تي مڪمل نموني عملدرآمد ڪيو وڃي ۽ ان حوالي سان ڪا به خلاف ورزي نه ڪئي وڃي، اجلاس ۾ لاڳاپيل ادارن کي ايندڙ ٻن ٽن هفتن ۾ هائيڊل بجلي پيداوار وڌڻ جي صورت ۾ لوڊشيڊنگ گهٽائي هڪ کان 2 ڪلاڪ ڪرڻ جي هدايت ڪئي وئي آهي.
|