بجلي بحران جلد حل ٿيندو،ذوالفقار جونيئر کي سيڪيورٽي ملڻ گهرجي:شازيه مري

ڪراچي (بيورو رپورٽ) سنڌ ترقي پسند پارٽي ضلعي سانگهڙ جي صدر ڊاڪٽر مدد علي لسڪاڻي پ پ ۾ باضابطا طور شامل ٿيڻ جو اعلان ڪيو آهي، ان سلسلي ۾ هن اطلاعات واري وزير شازيه مري سان گڏ ڪالهه ڪراچي پريس ڪلب ۾ هڪ پريس ڪانفرنس ڪئي، شازيه مري ڊاڪٽر مدد علي لسڪاڻي کي پ پ ۾ شامل ٿيڻ تي ڀليڪار ڪندي چيو ته جيڪي پ پ سان پراڻيون سلهاڙيل شخصيتون هيون، 1988ع ۾ غير جمهوري حڪومتن جي دٻاءَ سبب مجبوري مان ڌار ٿي ويا هئا، سي هاڻي مڪمل جمهوريت بحال ٿيڻ ڪري واپس اچي ويا آهن، شازيه مري ڪراچي ۾ ڪي اي ايس سي جي بحران بابت چيو ته ڪي اي ايس سي کي نئين البراج گروپ سنڀاليو آهي، جنهن سان وڏو وزير جلد گڏجاڻي ڪندو ۽ ڪراچي شهر اندر بجلي جي بحران کي جلد حل ڪيو ويندو، هن چيو ته اسان بلدياتي نظام جي حق ۾ آهيون، جنهن کي بهتر ڪرڻ جي ضرورت آهي، هن چيو ته ذوالفقار ڀٽو جونيئر کي سيڪيورٽي ڏيڻ گهرجي پر ان کي سيڪيورٽي ملي آهي نه! مون کي ان بابت خبر ناهي.